En nosse gurni dj'a trové ine vîye bûse.

Lâdje dizeûr et d'zo, tote rastreûtiye, â mitan, avou des bwêrds come ine main : c'est-on vî tchapè dè timps passé qui n'est pus bon qui po fé les carnavals.

Dispôy swèssante ans ans, mutwè, elle esteût toumêye inte li meûr et ine caisse d'hôrlodje. Tote binâhe d'èsse rouvîye, èle si catchîve la, come ine djin qu'ènn' a brâmint vèyou et qu'a todis sogne qu'on n' si moque di lèye.

Quand djèl sètcha foûs di s'catchète et qui djèl louka tchèrdjîye d'arincrins et tote grise di poussîre, i m'falla rîre a veûye les droles di modes qu'on-z-aveût d'vins l'timps, et a sondjî, mâgré mi, qu'is èstît bin sots les cis qui tchâssît des afaires insi so leû tiesse.

Dj'ala portant qwère ine hov'lète et djis dispoûs'la li vîye bûse.

Tot doûç'mint li poussîre volève èvôye et on pau a 'ne fîye li tchapê ridiv'néve neûr dizo l'hov'lète.

Come dj'esteû tot djondant del finièsse, li solo qui touméve so mes mains fat r'lûre on pô li vîye bûse qui dji v'néve di trover, - et d'on plein côp, dji sinta bin qui les mwêrts et tos les vîs d'oûy ont-st-avou leû djônesse ossi.

L'îdèye dè rire esteût èvôye, et dji n'poléve pus mâ, allez, vî tchapê, di m'moquer d'vos ; ca tot v' loukant, i m'sonla qui dj' èsteût adlez on fwêrt vî home qu'âreût di s'prumîre crapaude ; et dji v' vèya, vîye bûse, tote gâye et tote nète come vos estis qwand on v' prinda foû d'vosse lâsse.
............................................................................................

C'èst èl condroz, on dè meûs d'may èvès treûs heûres après l' dîné.

Dizeû l'bwès, on solo d'bon timps blame djoyeûs'mint, tchâfe tote li campagne, et bin lon, bin lon, fait r'glati on teût d'èglîse, divins les âbes.

I-n-a è l'air ine saqwè d' doûs et d' hêtî qui sint bon et qui fait dè bin.

Tot d'on côp, â tournant del vôye, vola l'marièdje qui vint.

Èn' avant, c'est l'djône cope qui rote li prumî, tote fîr et tote binâhe di viker.

Li mariêye a mètou si noûne rôbe a fleûrs ; so sès spales elle a mètou on breune châle, et si p'tit visèdje est tot fris' dizo l' blanke côrnète qui lî va si bin.

Ainsi vo-le-la v'nou, li grand djoû, vo-le-la mariêye !

Et l'djône feume si rapinse tot l'timps qu'elle a hanté, èle louke tot âtoû d'lèye li campagne avou tos les grains qui crèhèt, les hâyes totès vètes et, â bwêrd del route, les p'tits bleûs oûys d'Avièrge qui s'drovet â solo.

Èle veût tot çoula. Èle sint bin qui c'èst-on grand boneûr d'èsse djône. Et, tote awoureuse, èle s'aspôye pus fwêrt sol brèsse di si-home qui rote adlez lèye.

Lu, avou s'bûse, et s'haut golé qui lî vint âs orèyes, i s'tint tot reûd, on pau djinné dè sinti so ses reins in' habit d'fin drap, lu qu'est todis si bin a si-âhe avou  s'grand sâro di tos les djoûs.

Adon, tot sofoqué d'djôye, in'sét vrêmint rin trover a dire a s'feume, et i n'fait qui di li rèpèter tot bas et tot doûç'mint : « Mi fèye, mi p'tite fèye, va ! »

Tot près d'zèls, ine alôye tchiriptant s'èmonta joyeus'mint.

Et, tot âtou dès djônes mariés, li campagne is' sitindéve tote clére di loumîre. Dès p'titès djènès fleûrs, divins les prés ravisît des gotes di solo. Li vint r'mouwéve doûç'mint dès grandes plaques di wassin dèdja pôtî. Dès boquets d'wèdje avît ine coleûr d'ârdjint. Et fou dè trimblènes di France, i montéve ine bone odeûr di djônesse et d'corèdje.

Noûf ou dîs copes sûvît les prumis. Les djônes èn avant riyît et s'kibatît, si rafiyant d'esse rèvôye po tchanter et po danser. Les vîs, qui n'rotet pus reûd, vinît podrî, zèls ossi si rafiyant d'esse rintrés, nin po danser, mins po magnî on bon boquet et beûre quéquès sopènes di vin.

Et, li dièrinne di totes, li mame dè djône marié louke roter s' fi d'vant lèye, avou s'haute bûse qui r'lût â solo.

Li pauve vîye feume si d'mande si s'fi sèrèt pus awoureûs qu'èle ni l'a stu, si s'feume et lu s'ètindront bin, et si l'noûve bûse qui r'lût si fwêrt â solo n'îrèt mâye qu'a des batèmes et a des fièsses.
.........................................................................................

È nosse gurnî dj'a trové ine vîye bûse. Lâdje dizeûr et d'zos, tote rastreûtîye â mitan, avou des bwêrds come ine main, - c'èst-on vî tchapê dè timps passé qui n'est pu bon qui fé les carnavals...